މި އޮތޯރިޓީގެ ޗީފް އެގްޒެކެޓިވް އޮފިސަރ އަލްފާޟިލް މުހައްމަދު ނިމާލް ޗައިނާއަށް ރަސްމީ ދަތުރުފުޅެއްކުރައްވައިފި

ޗައިނާއިން ރާއްޖެއަށް ކަނޑައަޅުއްވައިފައި ހުންނަވާ ސަފީރު އޮނޮރަބަލް މިސް ވަންގް ލިޒިންގެ ދައުވަތަކަށް މި އޮތޯރިޓީގެ އޮތޯރިޓީގެ ޗީފް އެގްޒެކެޓިވް އޮފިސަރ އަލްފާޟިލް މުހައްމަދު ނިމާލާއި އޮތޯރިޓީގެ ޓީމެއް އަދި ކައުންސިލްތަކުން ބައެއް މޭޔަރުންނާއި، ކައުންސިލްތަކުގެ ރައީސުންނާއި، ނައިބުން އަދި އެސްޖީން ޗައިނާގެ ޔުނާން ޕްރޮވިންސަށް ދަތުރުފުޅެއް ކުރައްވައިފިއެވެ. 14 ބޭފުޅުން ހިމެނޭ މި ދަތުރަށް މާލެއިން ޗައިނާގެ ޔުނާނަށް ފުރާފައިވަނީ އޮކްޓޯބަރ މަހުގެ ސާދަ ވަނަ ދުވަހުގެ ރެއެވެ.

މިދަތުރުގައި ޗައިނާގެ ޔުނާން ޕްރޮވިންސްގައި ދެމެހެއްޓެނިވި ތަރައްގީއާއި ދަނޑުވެރިކަމާއި ސިއްހަތާއި ރަށްތައް ދިރުވައި އާލާކުރުމުގެ ގޮތުން އެ ޕްރޮވިންސްގެ ބައެއް ޝަހަރުތަކުން ކުރަމުން އަންނަ މަސައްކަތްތައް ބެލުމުގެ ފުރުސަތުވަނީ ލިބިފައެވެ. ހަތަރު ދުވަހުގެ ތެރޭގައި ޝިއަންރެންޑޮންގް ވިލެޖުގައި ދަނޑުވެރިކަމާއި ފަތުރުވެރިކަމާއި ސަގާފީ އިންޓަގްރޭޝަން ބޭނުންކޮށްގެން ލޯކަލް އާމްދަނީ އިތުރުކޮށް ދެމެހެއްޓެނިވި ކުރިއެރުން ހޯދާ ގޮތް ފެނިގެން ދިޔައެވެ. އަދި ބަންގޫ އަވަށުގައި ތަރުކާރީއާއި މޭވާ އިންދުމުގައި ބޭނުން ކުރަމުން އަންނަ އެކުއާފޯނިކްސްގެ އުކުޅުތަކާއި ސަންގުއަންގް އަވަށުގައި 'ސްޓޯނީ ޑެޒާޓިފިކޭޝަން' މެނޭޖްކުރުމަށްޓަކައި އެއަވަށުގެ ރައްޔިތުންގެ މިންނެތް މަސައްކަތް ހާމަވެގެންދާ މައުރަޒެއްގެ އިތުރުން ޕްރެޒެންޓޭޝަނެއް ވަނީ ދައްކާފައެވެ.

ސިއްހީ މަސައްކަތްތައް ބެލުމަށް ދަތުރުގެ ބައިވެރީން ވަނީ މެޓަނަލް އެންޑް ޗައިލްޑް ހެލްތު ހޮސްޕިޓަލަށް ޒިޔާރަތްކޮށްފަ އެވެ. އަދި މަލިޕޯގެ ތައުލީމީ ނިޒާމު ހުރިނެތްގޮތް ބެލުމަށްޓަކައި މަލިޕޯ މިޑްލް ސްކޫލަށްވަނީ ޒިޔާރަތްކޮށްފައެވެ. ޝިއާލިއަންޝުއީ ވިލެޖުގައި ރައްކާތެރި ބޯފެނުގެ މަޝްރޫއެއް ވެސް ތަހުގީގުކޮށްފައިވާއިރު، މިއީ އެ ވިލެޖުތަކުގެ އާންމު ސިއްހަތު ރަނގަޅު ކުރުމަށް ޗައިނާއިން ކުރަމުން އަންނަ  މަސައްކަތްތައް ދައްކުވައިދޭ ކަމެކެވެ. އިގްތިސާދީ ތަރައްގީގެ މަސައްކަތްތައް ތަޖުރިބާ ކޮށްލުމަށް ޕިންގަންޕޯ ވިލެޖްގެ ކޮންޖަކް ސިނާއަތާއި އެ ސަރަހައްދުގެ ފުޅާ ސިނާއީ ސްޓްރެޓެޖީގެ ބައެއް ކަމަށްވާ ވެންޝަން ކިހުއާ ކުންފުނީގެ ސޫޑޯ ޖިންސެންގް ޕްރޮސެސިން ސެންޓަރަށް ޒިޔާރަތް ކުރެވުނެވެ.

މިދަތުރުގެ އެންމެ މުހިއްމު ހިޔާލުފާޅުކުރުމާއި މަޝްވަރާތައް ކުރެވިފައިވަނީ ވެންޝާން ޕްރިފެކްޗާ އޮފީހާއި ޔުނާން ފޮރިން އެފެއާޒް އޮފީހަށް ކުރެވުނު ޒިޔާރަތުގައެވެ. ޔުނާން ފޮރިން އެފެއާޒް އޮފީހުގެ ޑެޕިއުޓީ ޑިރެކްޓަރ ޖެނެރަލް މާ ޒުއޮކްސިނާއިއެކު ބޭއްވުނު ބައްދަލުވުމުގައި މި އޮތޯރިޓީގެ ޗީފް އެގްޒެކެޓިވް އޮފިސަރ އަލްފާޟިލް މުހައްމަދު ނިމާލް ދެއްކެވި ވާހަކަފުޅުގައި ދެމެހެއްޓެނިވި ތަރައްގީގައި ރާއްޖެއާއި ޗައިނާ ހިއްސާކުރެވޭ ލަނޑުދަނޑިތަކަށް އަލިއަޅުއްވައި މި ކާމިޔާބު ދަތުރުގެ ސަބަބުން ތިމާވެށްޓާއި މުޖުތަމައު މަރުކަޒުކޮށްގެން އިޖްތިމާއީ މަޝްރޫއުތައް ހިންގޭނެ މަގު، ފަހިވެފައިވާކަން ވަނީ ފާހަގަކުރައްވާފައެވެ.

އަދި ހަމަ އެމަނިކުފާނުގެ ވާހަކަފުޅުގައި ލާމަރުކަޒީ ނިޒާމު ބިނާކުރުމާއި ހަރުދަނާކުރުމަށް ޗައިނާއިން ފޯރުކޮށްދީފައިވާ އެހީތެރިކަމާއި  ލިބިވަޑައިގެންނެވި ފަސްނުޖެހޭ އެއްބާރުލުމަށްޓަކައި، ޗައިނާ ސަރުކާރަށް ޝުކުރު އަދާކުރެއްވިއެވެ. އަދި އެކްސްޕޯޝަރ ޓްރިޕްތަކާއި ކެޕޭސިޓީ ބިލްޑިންގ ޕްރޮގްރާމްތަކުން ފެށިގެން ލޯކަލް ފެންވަރުގައި އިންފްރާސްޓްރަކްޗަރ ޕްރޮޖެކްޓްތަކާ ހަމައަށް، ދިވެހިރާއްޖޭގެ ލޯކަލް ގަވަރނަންސް ފްރޭމްވޯކް ބައްޓަންކުރުމުގައި ޗައިނާގެ އެހީތެރިކަން ވަރަށް ބޮޑަށް ލިބިފައިވާކަން ވަނީ ފާހަގަކުރައްވާފައެވެ. ޗައިނާ ސަރުކާރުގެ އިރުޝާދުގެ އަލީގައި ކައުންސިލްތަކުގެ ޤާބިލުކަމާއި ޤާބިލުކަން ކުރިއެރުވުމަށް، ދިވެހި ރައްޔިތުންގެ ދިރިއުޅުމަށް އައިސްފައިވާ ހެޔޮބަދަލުތަކަށް ވަނީ ހާއްސަ ޝުކުރެއް އަދާކުރައްވާފައެވެ.