"ލާމަރުކަޒީ ޤާނޫނަށް އަހުލުވެރިކުރުމުގެ ތަމްރީނު" ޕްރޮގްރާމް ކާމިޔާބުކަމާއެކު ނިންމާލައިފި

މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް އާއި މާލެއަތޮޅު އަތޮޅު ކައުންސިލް ގުޅިގެން، ނޮވެންބަރު މަހުގެ 18 ވަނަ ދުވަހު "ލާމަރުކަޒީ ޤާނޫނަށް އަހުލުވެރިކުރުމުގެ ތަމްރީނު" ގެ ނަމުގައި ޚާއްޞަ ތަމްރީނު ޕްރޮގްރާމެއް ވަނީ ބާއްވާފައެވެ. މި މުހިންމު ތަމްރީނު ޕްރޮގްރާމް ކުރިއަށް ގެންގޮސްފައިވަނީ ލޯކަލް ގަވަރމަންޓް އޮތޯރިޓީގެ ކިޔެވެނި މާލަމުގައެވެ.
މި ޕްރޮގްރާމުގައި މާލެއަތޮޅު އަތޮޅު ކައުންސިލާއި އެ އަތޮޅުގެ 9 ރަށު ކައުންސިލް ހިމެނޭގޮތަށް، ޖުމްލަ 31 ބައިވެރިން ބައިވެރިވެ ވަޑައިގެންނެވިއެވެ.
ލާމަރުކަޒީ ނިޒާމާ ގުޅޭގޮތުން ހޭލުންތެރިކަން އިތުރުކުރުމުގެ މަޤްޞަދުގައި ބޭއްވުނު މި ތަމްރީނުގައި، ލާމަރުކަޒީ ޤާނޫނާއި، ކައުންސިލްތަކުގެ އިޖުރާއީ ޤަވާއިދާ ގުޅޭ މަޢުލޫމާތުގެ އިތުރުން، ކައުންސިލްތަކުގެ ބިއުރޯގެ މަސައްކަތްތަކާ ގުޅޭ އަގުހުރި މަޢުލޫމާތުތަކެއް މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސްގެ ޓްރޭނަރުންވަނީ ތަމްރީނުގެ ބައިވެރިންނާ ހިއްސާކުރައްވާފައެވެ.