"ލާމަރުކަޒީ ހުނަރު އިތުރު ކުރުމުގެ ތަމްރީނު ޕްރޮގްރާމް" ހދ.އަތޮޅުގައި ކުރިޔަށް ގެންގޮސްފި

މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް އަދި ސިވިލް ސަރވިސް ކޮމިޝަނާ ގުޅިގެން ހދ.އަތޮޅު ކައުންސިލުން އަތޮޅުގެ ކައުންސިލްތަކުގައި ލާމަރުކަޒީ ނިޒާމާ ގުޅޭ ހޭލުންތެރިކަން އިތުރުކުރުމުގެ ގޮތުން "ލާމަރުކަޒީ ހުނަރު އިތުރު ކުރުމުގެ ތަމްރީނު ޕްރޮގްރާމް" ގެ ނަމުގައި ޚާއްޞަ ތަމްރީނު ޕްރޮގްރާމެއް ކުރިޔަށް ގެންގޮސްފިއެވެ. މި ތަމްރީނު ޕްރޮގްރާމް ކުރިޔަށް ގެންދެވިފައިވަނީ ނޮވެންބަރު މަހުގެ 12 އިން 14 އަށެވެ.

ހދ. އަތޮޅުގެ ރަށު ކައުންސިލްތަކަށް އަމާޒުކޮށްގެން ކުރިއަށް ގެންދެވުނު މި ތަމްރީނު ޕްރޮގްރާމުގައި، ރަށްރަށުގެ ކައުންސިލް ރައީސުން، ސެކްރެޓަރީ ޖެނެރަލުން އަދި އަތޮޅު ކައުންސިލުގެ މެންބަރުން ހިމެނޭ ގޮތަށް ޖުމްލަ 53 ބައިވެރިން ވަނީ ޙިއްޞާވެފައެވެ.

ތަމްރީނު ޕްރޮގްރާމުގެ ސެޝަންތަކުގައި، ކައުންސިލްތަކުގައި ގަވަރމަންޓް އީ-ލެޓަރ މެނޭޖްމަންޓް ސިސްޓަމް ބޭނުންކުރުމާއި، ކައުންސިލްތަކުގެ ބަޖެޓާއި ފައިނޭންސްގެ މަސައްކަތާއި، މައިކްރޮސޮފްޓް-365 ބޭނުންކޮށްގެން ކައުންސިލްތަކުގެ އިދާރީ މަސައްކަތްތައް ތަރުތީބުކުރުމާ ގުޅޭގޮތުން ހޭލުންތެރިކަން އިތުރު ކުރެވުނެވެ.

މި ތަމްރީނު ޕްރޮގްރާމްގެ ސެޝަންތައް ފެސިލިޓޭޓްކޮށްދެއްވާފައިވަނީ މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސްގެ ޓްރެއިނިންގ ސެކްޝަންގެ ބޭފުޅުންނެވެ. އަދި މީގެ އިތުރުން ސިވިލް ސަރވިސް ކޮމިޝަނުގެ ނައިބު ރައީސް އަލްފާޟިލް އިބްރާހީމް ރަޝީދު ވަނީ ސިވިލް ސަރވިސްގެ ދައުރާ ގުޅޭގޮތުން ޚާއްޞަ ސެޝަނެއް ކުރިއަށް ގެންގޮސްދެއްވާފައެވެ.